ಷಡ್ಯಂತ್ರಕ್ಕೆ ತಕ್ಕ ಉತ್ತರ ಕೊಟ್ಟಿದ್ದೇವೆ: ಜಗಳೂರು ಬರಪೀಡಿತ ಪಟ್ಟಿಗೆ ಸೇರ್ಪಡೆ ಬೆನ್ನಲ್ಲೇ ಶಾಸಕ ದೇವೇಂದ್ರಪ್ಪ ಆಕ್ರೋಶ!

ಜಗಳೂರು: ಬರಪೀಡಿತ ತಾಲೂಕುಗಳ ಪಟ್ಟಿಯಲ್ಲಿ ಜಗಳೂರಿನ ಹೆಸರು ಕಾಣಿಸಿಕೊಂಡಿಲ್ಲ ಎಂಬ ಒಂದೇ ಕಾರಣಕ್ಕೆ ಅನೇಕರು ನನ್ನ ವಿರುದ್ಧ ವೈಯಕ್ತಿಕ ತೇಜೋವಧೆಗೆ ಪ್ರಯತ್ನಿಸಿದ್ದರು. ಅವರೆಲ್ಲರಿಗೂ ಉತ್ತರ ಎಂಬಂತೆ ಜಗಳೂರು ಮೂರನೇ ಬರಪೀಡಿತ ತಾಲೂಕು ಪಟ್ಟಿಯಲ್ಲಿ ಸೇರ್ಪಡೆಗೊಂಡಿದ್ದು. ಜಗಳೂರಿನ ರೈತರನ್ನು ನಮ್ಮ ಸರ್ಕಾರದ ವಿರುದ್ಧ ಎತ್ತಿ ಕಟ್ಟಲು ಅನೇಕರು ಪ್ರಯತ್ನಿಸಿದ್ದರು ಎಂದು ಜಗಳೂರು ಶಾಸಕ ಬಿ. ದೇವೇಂದ್ರಪ್ಪ ಆಕ್ರೋಶ ವ್ಯಕ್ತಪಡಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಎಲ್ಲಾ ಷಡ್ಯಂತ್ರಗಳಿಗೆ ಉತ್ತರ ನೀಡಿದ್ದೇವೆ. ಇಂದು ಬರಪೀಡಿತ ತಾಲೂಕಿನ ಪಟ್ಟಿಯೊಂದಿಗೆ ಬೆಂಗಳೂರಿನಿಂದ ಜಗಳೂರಿಗೆ ಆಗಮಿಸಿದ್ದೇನೆ. ಇದು ಜಗಳೂರಿನ ರೈತರ ಜೊತೆಗೆ ಕಾಂಗ್ರೆಸ್ ಕಾರ್ಯಕರ್ತರಿಗೂ ಹೇಳಿಕೊಳ್ಳಲಾಗದಷ್ಟು ಸಂತೋಷದ ಕ್ಷಣವಾಗಿತ್ತು ಎಂದು ತಿಳಿಸಿದರು.

ಅನೇಕರು ಸಂಭ್ರಮದ ಜೊತೆ ಸಿಹಿ ತಂದು ಹಂಚಿದರು. ನನ್ನ ಮೇಲೆ ಅವರು ಇಟ್ಟಿರುವ ಪ್ರೀತಿಯ ಧ್ಯೋತಕ ಸಂಭ್ರಮ ಇದು. ವಿರೋಧ ಪಕ್ಷವಾದ ಬಿಜೆಪಿಯವರು ಇನ್ನು ಮುಂದಾದರೂ ಜನಪರ ಹೋರಾಟ ನಡೆಸಲಿ. ಈಗ ಜಗಳೂರು ಸೇರ್ಪಡೆಯಾಗಿದೆ. ಈಗ ಬಿಜೆಪಿಯವರು ಏನು ಮಾಡುತ್ತಾರೆ ಎಂದು ಪ್ರಶ್ನಿಸಿದರು.