ಬ್ಲಡ್ ಕ್ಯಾನ್ಸರ್ ಮೆಟ್ಟಿ ಎಸ್ಎಸ್ಎಲ್‌ಸಿಯಲ್ಲಿ 94% ಗಳಿಸಿದ ದಾವಣಗೆರೆಯ ಶಾಂತ

ದಾವಣಗೆರೆ: ಬ್ಲಡ್ ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಯನ್ನು ಎದುರಿಸಿದ್ದರೂ, ನಿಟ್ಟುವಳ್ಳಿಯ ಸರ್ಕಾರಿ ಶಾಲೆಯ ವಿದ್ಯಾರ್ಥಿನಿ ಶಾಂತ, ಎಸ್ಎಸ್ಎಲ್‌ಸಿ ಪರೀಕ್ಷೆಯಲ್ಲಿ 94% ಅಂಕಗಳೊಂದಿಗೆ ಶಾಲೆಗೆ ಪ್ರಥಮ ಸ್ಥಾನ ಗಳಿಸಿ, ರಾಜ್ಯದ ಜನರ ಮನಸ್ಸನ್ನು ಕದ್ದಿದ್ದಾಳೆ.

ದಾವಣಗೆರೆ ನಿಟ್ಟುವಳ್ಳಿಯ ನಿವಾಸಿಯಾದ ಶಾಂತ, 9ನೇ ತರಗತಿಯ ಅರ್ಧವಾರ್ಷಿಕ ಪರೀಕ್ಷೆಯ ಸಂದರ್ಭದಲ್ಲಿ ಬ್ಲಡ್ ಕ್ಯಾನ್ಸರ್‌ಗೆ ತುತ್ತಾಗಿರುವುದು ತಿಳಿದುಬಂದಿತ್ತು. ಆಕೆಯ ತಂದೆ ಗಾರೆ ಕೆಲಸಗಾರರಾಗಿದ್ದರೆ, ತಾಯಿ ಕೂಲಿ ಕೆಲಸ ಮಾಡಿ ಕುಟುಂಬವನ್ನು ಪೋಷಿಸುತ್ತಿದ್ದರು. ಮಗಳ ಆರೋಗ್ಯ ಸಮಸ್ಯೆಗೆ ಚಿಕಿತ್ಸೆಗಾಗಿ ಸಾರ್ವಜನಿಕರು ಮತ್ತು ಶಿಕ್ಷಕರ ಸಹಾಯದಿಂದ 13 ಲಕ್ಷ ರೂ. ವೆಚ್ಚದಲ್ಲಿ ಚಿಕಿತ್ಸೆ ನೀಡಿ ಗುಣಮುಖಗೊಳಿಸಿದ್ದರು.

ಕಾಯಿಲೆಯ ಸವಾಲುಗಳ ನಡುವೆಯೂ ಶಾಂತ ತನ್ನ ಓದಿನಲ್ಲಿ ಛಲ ಬಿಡಲಿಲ್ಲ. ಗೊಂದಲಗಳಿದ್ದಾಗ ಶಿಕ್ಷಕರಿಗೆ ಕರೆ ಮಾಡಿ ಸ್ಪಷ್ಟನೆ ಪಡೆದು, ನಿರಂತರ ಅಭ್ಯಾಸದಲ್ಲಿ ತೊಡಗಿದ್ದಳು. ಒಂದು ವರ್ಷ ಶಾಲೆಗೆ ಗೈರಾಗಿದ್ದರೂ, ತನ್ನ ಗುರಿಯಿಂದ ಹಿಂದೆ ಸರಿಯದ ಶಾಂತ, ಈ ಬಾರಿಯ ಎಸ್ಎಸ್ಎಲ್‌ಸಿ ಪರೀಕ್ಷೆಯಲ್ಲಿ ಉತ್ತಮ ಸಾಧನೆ ಮಾಡಬೇಕೆಂಬ ಸಂಕಲ್ಪದೊಂದಿಗೆ ತಯಾರಿ ನಡೆಸಿ, 94% ಅಂಕಗಳನ್ನು ಪಡೆದು ಎಲ್ಲರ ಮೆಚ್ಚುಗೆಗೆ ಪಾತ್ರಳಾದಳು.

ಗ್ರಾಮಸ್ಥರು, ಜಿಲ್ಲೆಯ ಜನರು ಹಾಗೂ ಶಿಕ್ಷಕರು ಶಾಂತಳ ಈ ಅಸಾಧಾರಣ ಸಾಧನೆಯನ್ನು ಕೊಂಡಾಡಿದ್ದಾರೆ. ಕಾಯಿಲೆಯಿಂದ ಚೇತರಿಸಿಕೊಂಡು, ದೃಢ ಮನಸ್ಸಿನಿಂದ ಈ ಯಶಸ್ಸನ್ನು ಸಾಧಿಸಿದ ಶಾಂತ, ಎಲ್ಲರಿಗೂ ಸ್ಫೂರ್ತಿಯಾಗಿದ್ದಾಳೆ.