ದಾವಣಗೆರೆ: ಅಡಿಕೆ ದರದಲ್ಲಿ ಭರ್ಜರಿ ಚೇತರಿಕೆ, ಗರಿಷ್ಠ ಬೆಲೆ ಕ್ವಿಂಟಲ್‌ಗೆ ₹59,312ಕ್ಕೆ ಏರಿಕೆ

ದಾವಣಗೆರೆ, ಮೇ 19: ಜಿಲ್ಲೆಯ ಪ್ರಮುಖ ವಾಣಿಜ್ಯ ಬೆಳೆಯಾದ ಅಡಿಕೆ ದರವು ಮತ್ತೆ ಗಮನಾರ್ಹ ಏರಿಕೆ ಕಂಡಿದ್ದು, ಬೆಳೆಗಾರರಲ್ಲಿ ಸಂತಸ ಮೂಡಿಸಿದೆ. ಚನ್ನಗಿರಿ ಮಾರುಕಟ್ಟೆಯಲ್ಲಿ ಇಂದು (ಮೇ 19) ರಾಶಿ ಅಡಿಕೆಯ ಗರಿಷ್ಠ ಬೆಲೆ ಪ್ರತಿ ಕ್ವಿಂಟಲ್‌ಗೆ ₹59,312 ತಲುಪಿದ್ದು, ಕಳೆದ 4-5 ದಿನಗಳಿಂದ ಸತತ ಏರಿಕೆ ಕಾಣುತ್ತಿದೆ. ಈ ರೇಟ್ ನ ಏರಿಕೆಯೊಂದಿಗೆ ದರವು ಮತ್ತೆ ₹60,000 ಗಡಿಯ ಸನಿಹಕ್ಕೆ ತಲುಪಿದೆ.

ಚನ್ನಗಿರಿ ಮಾರುಕಟ್ಟೆಯ ಇಂದಿನ (ಮೇ 19) ಅಡಿಕೆ ರೇಟ್ (ಪ್ರತಿ ಕ್ವಿಂಟಲ್):

ರಾಶಿ ಅಡಿಕೆ:

• ಗರಿಷ್ಠ ಬೆಲೆ: ₹59,312
• ಕನಿಷ್ಠ ಬೆಲೆ: ₹54,479
• ಸರಾಸರಿ ಬೆಲೆ: ₹57,685

ಬೆಟ್ಟೆ ಅಡಿಕೆ:

• ಗರಿಷ್ಠ ಬೆಲೆ: ₹32,679
• ಕನಿಷ್ಠ ಬೆಲೆ: ₹27,679
• ಸರಾಸರಿ ಬೆಲೆ: ₹29,431

ಜಿಲ್ಲೆಯ ಚನ್ನಗಿರಿ, ಹೊನ್ನಾಳಿ, ದಾವಣಗೆರೆ, ಹರಿಹರ ಮತ್ತು ಜಗಳೂರು ತಾಲ್ಲೂಕುಗಳಲ್ಲಿ ಅಡಿಕೆಯು ಪ್ರಮುಖ ಕೃಷಿ ಬೆಳೆಯಾಗಿದೆ. ಪ್ರಸ್ತುತ, ಜಿಲ್ಲೆಯಲ್ಲಿ ಬೇಸಿಗೆಯ ತಾಪಮಾನ ಕಡಿಮೆಯಾಗಿದ್ದು, ಮುಂಗಾರು ಪೂರ್ವ ಮಳೆಯಾಗುತ್ತಿದೆ. ರೈತರು ಮುಂಗಾರು ಮಳೆಯ ಆಗಮನಕ್ಕಾಗಿ ಕಾತರದಿಂದ ಕಾಯುತ್ತಿದ್ದಾರೆ.

ಅಡಿಕೆ ದರದ ಏರಿಕೆ

ಈ ವರ್ಷದ ಜನವರಿಯಲ್ಲಿ ಅಡಿಕೆ (ರೇಟ್)  ದರವು ₹52,000 ಒಳಗಿತ್ತು. ಫೆಬ್ರವರಿಯಲ್ಲಿ ಏರಿಕೆಯಾಗಿ ₹53,000 ಗಡಿ ದಾಟಿತು. ಮಾರ್ಚ್ ಆರಂಭದಲ್ಲಿ ಸ್ವಲ್ಪ ಕುಸಿತ ಕಂಡರೂ, ತಿಂಗಳ ಕೊನೆಯಲ್ಲಿ ಮತ್ತೆ ₹53,000 ತಲುಪಿತು. ಏಪ್ರಿಲ್ 23ರಂದು ಗರಿಷ್ಠ ಬೆಲೆ ₹60,669 ತಲುಪಿದ್ದು, ತಿಂಗಳ ಕೊನೆಗೆ ₹59,000 ಒಳಗೆ ಇಳಿಯಿತು. ಮೇ ತಿಂಗಳ ಆರಂಭದಲ್ಲಿ ದರವು ಮತ್ತಷ್ಟು ಕುಸಿದಿದ್ದರೂ, ಈಗ ಮತ್ತೆ ₹59,312ಕ್ಕೆ ಚೇತರಿಸಿಕೊಂಡಿದೆ.

ಕಳೆದ ವರ್ಷ (2024) ಮೇ ತಿಂಗಳಲ್ಲಿ ಗರಿಷ್ಠ ಬೆಲೆ ₹55,000 ಆಗಿತ್ತು, ಆದರೆ 2023ರ ಜುಲೈನಲ್ಲಿ ₹57,000 ತಲುಪಿತ್ತು. ಪ್ರಸ್ತುತ ಏರಿಕೆಯಿಂದ ರೈತರಲ್ಲಿ ಆಶಾಭಾವನೆ ಮೂಡಿದ್ದು, ಮುಂಗಾರು ಮಳೆಯ ಆಗಮನದೊಂದಿಗೆ ಮಾರುಕಟ್ಟೆ ಇನ್ನಷ್ಟು ಚೇತರಿಕೆ ಕಾಣುವ ನಿರೀಕ್ಷೆಯಿದೆ.

ಮುಂದಿನ ದಿನಗಳಲ್ಲಿ ಅಡಿಕೆ ರೇಟ್

ಮುಂಗಾರು ಮಳೆಯ ಪ್ರಗತಿ ಮತ್ತು ಮಾರುಕಟ್ಟೆಯ ಬೇಡಿಕೆಯು ಅಡಿಕೆ ರೇಟ್ ಮೇಲೆ ಮಹತ್ವದ ಪರಿಣಾಮ ಬೀರಲಿದೆ. ಜಿಲ್ಲೆಯ ರೈತರು ಮಾರುಕಟ್ಟೆ ವಹಿವಾಟಿನ ಮೇಲೆ ತೀವ್ರ ನಿಗಾ ಇಟ್ಟಿದ್ದಾರೆ.